دعاء الرسول ﷺ يوم عرفة:

قال ﷺ خير الدعاء يوم عرفة، وخير ما قلت أنا والنبيون من قبلي:
«لا إله إلا الله وحده لا شريك له، له الملك وله الحمد وهو على كل شيء قدير»🤍.

اللهُمَّ أرني عجائب صُنعك في دعائي، وأرني لطفك ورحمتكَ في قضاءِ حوائجي، وأرني كرمك وقدرتك في ما تعلق به قلبي.

كل سنه و انتوا في خير و صحه و سلام بمناسبة المولد النبوي الشريف
يلا النهارده و بكرا نصلي علي النبي على قد ما نقدر
اللهم صل و سلم و بارك على حبيبنا محمد عليه افضل الصلوات و السلام

اللهم انصر فلسطين 🇵🇸
الدعاء ليهم يا جماعه 🤲 هم في اشد الحاجه للدعاء و المساعده بكل ما نملك

تبرعوا للهلال الاحمر المصري لمساندة اخواتنا واطفالنا و اهالينا ابرياء غزه …. المره دي اكتر من اي مره ارجوكم ارجوكم اللي يقدر يتبرع بأي شيء و بأي رقم و لو بسيط ياريت ميتأخرش

دعواتنا من كل قلوبنا لأهالينا ابرياء غزه
🤲ادعوا كتير يا جماعه ارجوكم🙏

في الوقت ده ناس كتير ايمانها بربنا ممكن يتزعزع او ينهار و يقولوا طب ربنا فين مش هرد بالآيات و الأحاديث عشان في ناس احق مني يتكلموا بلغة الدين بس انا هرد رد بسيط من واقع الدنيا … انت لو دخلت فيلم و جالك تليفون فا استعجلت و مشيت في ربعه الاولاني هل تقدر تحكم على نهاية الفيلم اكيد لأ يعني متحكمش على حاجه لسه مش خلصانه
طب الدنيا لسه شغاله مخلصتش يعني متعرفش بكرا ربنا شايل ايه متستعجلش و تحكم على الدنيا و انت لسه مشوفتش مرحلة النصر اللي ربنا وعد بيها اصلاً في قرآنه متحكمش دلوقتي حكمك هيكون غلط احنا لسه مكملناش الدنيا للآخر

(( يمهل ولا يهمل )) و اللي راحوا دول جريوا على الجنه اللي هي الحياه الاساسيه حياة الخُلد راحوا دار الحق و مشيوا من دار الباطل يا جماعه الدنيا دي ولا حاجه دي دار باطل فيها الشر و الكره و الحقد و الظلم .. لكن الناس دي راحت لحياه كلها حب و خير و سلام و فرح و لما في الآخره نشوف كل حد كانت حياته صعبه و مليانه معاناه ازاي ربنا كافئه على صبره و تحمله من كل اللي شافه و كرمه بأجمل نعيم الجنه هنقول (( ياريتنا كنا احنا )) الصبر يا جماعه و الثقه في وعد ربنا … الدنيا دلوقتي و سكان الارض انقسمت ٢ ناس ايمانهم راح و ناس اتمسكوا بعقيدتهم اكتر و دول اول ناس كسبوا معركة الدنيا ….. ثقوا في كاتب الدنيا العظيم انكم لازم هتسقفوا في النهايه من حلاوة نصره و هو بينصر المظلوم بمعجزه من عنده تتحقق في الوقت المناسب اللي يعلمه هو مش إحنا والله والله والله لازم يبقى معندناش شك نهائي في رحمته و فضله اكسبوا المعركه يا جماعه اوعوا ايمانكم بربنا يتهز احنا كلنا اصلاً عايشين في اختبار و لازم ننجح فيه .. ان شاء الله هتشوفوا بعنيكم اكبر رد من ربنا كما وعد في قرآنه الكريم (( ثقوا في الله )) ان وعد الله حق

من قوة تمسكي و اصراري و قناعتي برحمة ربنا ، بقالي فتره بدرس فكره معينه اعتقد بتشغل ناس كتير الوقت ده بسبب الحاله النفسيه المرعبه اللي عايشينها كلنا … كنت بقول معقول اللي بيتقتلوا ظلماً بالبشاعه دي في كل زمان هل بيحسوا و بيشوفوا هول و رعب الموقف و يتعذبوا بالطريقه الغير محتمله الواضحه للأشخاص الآخرين اللي حاضرين الموقف او شافوا الموقف في تلفزيون او موبايل !!!؟ … درست الموقف ده على حد اجتهادي الشخصي وصلت لآيه في القرآن الكريم مهمه جداً (( فكشفنا عنك غطاءك فبصرك اليوم حديد )) يعني اللحظه اللي اراد فيها ربنا ان يقبض روح بني آدم يدخل البني آدم في عالم آخر و يشوف حاجات تانيه الناس اللي عايشين ميقدروش يشوفوها ، يعني اللي بيتفرج بيشوف مشهد صعب جداً قد ليتعظ او لاي سبب اخر بس اللي في الموقف و الموت ينتظره مش بيشوف العذاب ده عشان بصره اليوم بيبقى حديد يعني بيدخل في عالم و زمن تاني عند ربنا فابيشوف حاجات تانيه و مهما تشوفوا جثث محروقه او مقتوله ، تأكدوا ان ربنا كان رحيم بأصحابها و مشافوش الموقف الصعب اللي انتوا شوفتوه ده ، و سورة الواقعه تثبت ده في الآيه الكريمه دي (( فلولا اذا بلغت الحلقوم و انتم حينئذ تنظرون و نحن اقرب اليه منكم و لكن لا تبصرون )) صدق الله العظيم يعني لو الروح او خروج النفس بيحصل و انتوا شايفين يعنيكم مثلاً شخص مظلوم و تم الغدر به و النار ماسكه فيه و يصرخ و انتوا شايفينه قدام عينكم بيتعذب ربنا هنا بيقول ان في اللحظه دي ربنا بيكون اقرب اليه منكم بس انتوا مش هتشوفوا يعني بتكون روحه بين يد ربنا بكل حب و رحمه و المشهد الصعب اللي انتوا شايفينه ده الشخص مش حاسس بيه خالص .. اوعوا تشكوا في رحمة ربنا مهما شوفتوا قدام عينكم مشاهد صعبه…. و على النقيض ….لما بيموت الظالم بيشوف مالا يسره و ما يفزعه في طريقة اخذ روحه …..و بعد دراستي الشخصيه الفكره دي اتأكدت من بعض رجال الدين الكبار التي تجمعني بهم صداقه و محبه و اكدولي صحة ما بحثت عنه .. جزاهم الله كل الخير .. سبحان الله .. القرآن مسابش لحظه متكلمش فيها و شرحها بدقه والله ياجماعه انا واثق ان كل حد فينا عنده مصاحف كتير بس للاسف في منها مهجور الكتاب ده عظيم و معجزه عايشه معانا و للاسف في بعضنا مش حاسس بقيمتها .. بوست من اجتهادي الشخصي ياريت اكون وصلت شيء من الطمأنينه و الاكثر مني علم ياريت يفيدنا بأكثر و ياريت كلنا نجتهد لنشر كل ما يطمن عن رحمة ربنا لعباده

صباح الهنا على اغلى الناس النهارده جمعه مباركه و ليله عظيمه مين عارف جايز تكون ليلة القدر ان شاء الله ، ايه رأيكم نكثف الدعاء و ندعي لبعض كتير من اول اليوم لآخره ، لفت نظري شرح جميل من الدكتور عمرو خالد عن سورة القدر ، و تحديداً آية (( ليلة القدر خير من الف شهر )) يعني الليله دي افضل من تقريباً ٨٤ سنه تخيل ربنا يغفرلك عمرك كله و لو عندك كل السنين دي ، يلا يا جماعه مين عارف مش جايز بدعاك النهارده ربنا يفرح قلبك العمر كله و يحققلك اللي نفسك توصله و يبدل حالك و حال اللي بتحبهم و يسامحك على كل الذنوب اللي انت متخيل انه مش هيسامحك عليها !!!؟ ،، ادعوا يا جماعه ربنا غفور و رحيم ،، و ندعي جامد اوي اوي اوي لاهل فلسطين الله يسترهم و ينصرهم و يعوض صبرهم و يحفظ كل شعوبنا العربيه و مصرنا الحبيبه … ربنا يتقبل منا جميعاً ان شاء الله 🤲